15°C SUMARDAGINN FYRSTA ?

Það lítur út fyrir einkar hlýtt veður nk. fimmtudag.  Hiti getur hæglega komist í 15 stig bæði á Akureyri og Reykjavík svo dæmi séu tekin.  Trausti Jónsson á Veðurstofunni hefur tekið saman veður hitafar þennan tiltekna daga í þriðju viku aprílmánaðar.  Hæsti hiti sumardaginn fyrsta í Reykjavík reynist verða 13,5°C árið 1998, en á Akureyri reyndar 19,8°C 1976.  Ólíklega fer hitinn svo hátt nú, en sumardagsmetið í Reykjavík gæti hæglega fallið. Ekki síður gamalt aprílhitamet í  Reykjavík.  Mesti mældi hiti er ekki nema 15,2°C frá því á stríðsárunum nánar tiltekið 29.apríl 1942.  Það verður spennandi að fylgjast með þessu. 

Lítum betur á málið.  Þrýstispákort Bresku Veðurstofunnar gildir kl. 12 á morgun miðvikudag.  Þá verða hitaskil á leið austur yfir landið.  Með þeim rignir um víðast eitthvað (taumar af Sahara-ryki koma með rigningunni).  Á eftir skilunum gerir austan golu og jafnvel blástur.  Loftið er milt af uppruna og komið langt að.  Ferilgreining reiknar uppruna alla leið frá A-Evrópu, Moldavíu og Úkraínu.  Leið þess liggur um Pólland og S-Skandinavíu.  Mögulega fylgir gusa af frjókornum úr þessari áttinni um þetta leyti ársins og daufur reykur frá landbúnaðareldum sem mjög eru tíðkaðir í þessum heimshluta í vetrarlok.

En aftur að spánni hér á fimmtudag.  Í A-áttinni léttir til a.m.k. um tíma á eftir skilunum um mikinn hluta landsins (þoka verður líklega með austurströndinni).   Hiti í 850 hPa fletinum verður +2 til 4 stig á fimmtudag ætti að gefa 7 til 9°C undir skýjuðum himni.  Nái hins vegar að létta til fer hiti um miðjan daginn hæglega í 14 til 15 stigin eins og spár, bæði Bliku og Veðurstofunnar gera ráð fyrir um miðjan daginn.   Stutt verður hins vegar í bakka (kuldaskil) í suðri og nær hann yfirhöndinni sunnanlands þegar líður á daginn ef af líkum lætur.