HLÝTT LOFT OG LANGT AÐ KOMIÐ

Á morgun miðvikudag er spáð talsvert áköfum, en skammvinnum hlýindum þegar fleygur af lofti með mjög suðlægan uppruna fer norðaustur yfir land.

Kjarni þess verður yfir Norður- og Austurlandi síðdegis og spá er +8°C í 850 hPa þrýstifletinum í um 1.300 m hæð.  Frostmarkshæðin fer í stuttu stund upp í allt að 2.500 m hæð !

Vissulega nokkuð sérstakt, en álíka hlýtt loft og jafnvel hlýrra hefur farið hér hjá um svipað leyti árs nokkrum sinnum áður. 

Uppruni loftsins er reiknaður með Hysplit ferlatólinu. Hingað komið í um 1.500 m hæða síðdegis reiknast uppruni loftsins  langt suður í Atlantshafi eða undan Afríkuströndum nærri 25°N. Þar er stutt í sjálft hitabeltið við miðbaug!  Því þarf ekki að undra að loftið sé hlýtt, þá vissulega hafi þða kólnað verulega á þessu 3 til 4 sólarhringa ferðalagi sínu. 

Hæstur verður hæstu í hnjúkaþey fyrir norðan. Á Akureyri kæmi mér ekki á óvart að hitinn komist í 12 til 13 stig og allt að 15°C þar sem best lætur norðanlands. Ætla að leyfa mér að spá að það gæti orðið á Sauðnesvita við Siglufjörð.

Við samanburð sést að þessi vetrarhlýindi eru þó ekki eins mikil og afgerandi og hér urðu í byrjun desember 2019.  Á Akureyri komst hiti þá í 15,5°C (2. des)  og sló fyrra hitamet frá 1964.  Litlar líkur á að hitinn komist í þær hæðir nú.  Þarna í byrjun desember fór hiti í 19,7°C á Kvískerjum sem er hæsti desemberhiti á landinu. Nóvembermetið er hærra, 22,7°C  á Dalatanga, 10. nóv 1999 í eftirminnilegri hitastroku, en  þá með SV-átt.