JANÚAR 2021 – VIÐ HVERJU MÁ BÚAST?

Ýmis  teikn eru á lofti þess efnis að meginhringrás norðurhvelsins sé mikið að veikjast þessa dagana og sértaklega strax eftir  eftir áramót. Hvers lags veður fylgir slíku er mjög að skýrast í langtímaverðurspám.

Fyrra kortið er úr smiðju ECMWF og er niðurstaða af 45 daga spá sem keyrð var í gærkvöldi (28. des).  Það sýnir spá um frávik 500 hPa hæðar á norðurhveli í janúar.  Þarna má sjá birtingarmynd grynnri heimskautahvirfils og veikari vestanvinda í háloftunum, sem eru einkennandi fyrirstöðuhæðir.  Greinileg Grænlandsfyrirstaða í þessari spá og lægðabrautin veikist og flyst sunnar.  Slíkar stöður eru vel þekktar og þá einnig veðurlagið hér á landi sem fylgir.  Almennt kólnar um N-Atlantshafssvæðinu og hafísnum norðurundan vex ásmeginn.

En vissulega er þetta meðalkort alls mánaðarins.  Séu hins vegar aðrar spár sömu keyrslu skoðaðar nær í tíma verður til eftirfarandi veðurspá:

Nýarsdagur til þrettánda:  Á nýársdag verða breytingar.  Með hækkandi loftþrýstingi fyrir austan land verður ríkjandi S-átt þessa daga og hlánar á landinu.  Engin stórátök en nokkuð  eindregið milt loft og með úrkomu vestantil, mest slyddu og rigningu.

7. – 10. janúar:  Kólnar með kuldaskilum úr vestri og snýst til N-áttar.  Hæglega getur gert nokkurt kast um leið og hann snýr sér til N-áttar.  Hæðin tekur sér bólfestu yfir Grænlandi þessa daga.

11 – 17. janúar:  Ríkjandi N-átt og fremur kalt í veðri.  Hita er spáð 2 til 6 stigum undir meðallagi eins og seinna kortið sömu daga ber með sér. Éljangur norðan- og norðaustantil, en lengst af alveg þurrt sunnantil.

18. - 31. janúar:  Líklega enn hæð yfir Grænlandi, en mögulega veikist hún (eða hverfur og sprettur upp aftur).  Ríkjandi N- eða NA-áttir.  Hiti undir meðallagi og enn sérlega þurrt og að mestu snjólaust um sunnanvert landið.

Þess má geta að langtíma spá GEFS (Bandaríska Veðurstofan) er í svipaða veru, helst að munur sé á smærri dráttum og síðan hvort eða öllu heldur hvenær háloftahringrásin nái sér aftur á strik eftir miðjan janúar eða e.t.v. síðar.