LANGTÍMASPÁ ÚT FEBRÚAR

Þorratunglið kviknaði 21. janúar daginn eftir bóndadag.  Kviknaði í vestri. Veðurklúbburinn á Dalvík sem var og hér forðum daga endurlífgaði eldri norðlenska þjóðtrú, að sú átt verði ríkjandi með nýkviknuðu  tungli. Nú kviknaði það í vestri

Sum sé V-átt ríkjandi á þorra. Hingað til hefur talsvert borið á vestlægum áttum og í það minnsta verið fremur lítið um  A- og NA-áttir sem að jafnaði eru fremur ríkjandi á þessum árstíma.

En hvað segir langtímaspáin?   

Lítum á mánaðarspá Evrópsku reiknimiðstöðvarinnar, fimmtudagskvöldið 9. feb.

Vika 1: 13. til 20. feb.

Lægðir munu áfram koma úr suðvestri.  Mögulega  fjórar: á mánudag, þriðjudag (lægðabylgja á skilum), á  föstudag og sunnudag. Trúlega munu þær ekki flokkast sem meiriháttar. Leysing lengst af, kólnar heldur undir helgi, en hlýnar síðan aftur. Markvert hlýrra en í meðallagi.  Ríkjandi S- og SV-áttir og klárlega spáð úrkomusömu sunnan- og vestanlands (kort).

Vika 2: 20. til 27. feb.

Því er spáð að meginháþrýstivæði næstu viku, reki frá meginlandi Evrópu til norðvesturs út á Atlanshaf. Um 60% safnspánna reikna með slíku reki. Aðeins um 10-15% þeirra að áframhald verði á lægðaganginum. Fari svo að hæðin verði hér suður- eða suðvesturundan breytist veðrið verulega.  Ríkjandi vindátt verður á milli SV og NV. Hita er spáð nærri meðallagi. Kaldara fyrir norðan og stutt þá  í hlýrra loft þá suðurundan.  Fylgir að þurrt verði suðaustan- og austanlands.

Uppi í heiðhvolfinu verða nú að teljast verulegar líkur á því að þar verði skyndihlýnun eins og hún er kölluð um 15. febrúar. Hlýnun þar uppi hefur verið í farvatninu í langtímaspám frá því um áramót, en runnið út í sandinn, þar til nú.  Skyndihlýnun eða SSW, hægir á heimskautahringrásinni og skotvindinum.  Hins  vegar tekur veikingu V-vinda í heiðhvolfinu gjarnan 10-14 daga að ná niður í veðrahvolfið. Síðasta korti sýnir frávik vindáttar í 850 hPa (um 1.250 m).  Meira um V-áttir og minna um A-áttir.

Enda er það svo að mánaðarspáin í byrjun mars er út og suður og fátt þar á hönd festandi. Líklega umpólun vinda uppi  í heiðhvolfinu á líklega mikinn þátt í greinilega minnkandi spágetu í 3. Vikunni, þ.e í byrjun mars.