Golfklúbbur Vopnafjarðar var stofnaður þann 18. september 2008 og hefur starfað samfleytt síðan. Þess má geta að stofnaður var golfklúbbur á Vopnafirði árið 1984 sem var allvirkur um stund en lagðist af 8 árum síðar. Menn gáfu þó drauminn aldrei upp á bátinn, menn og konur héldu áfram að arka um hlíðar golfvallarins ofan Skála í endalausri baráttu við hvítu kúluna.
Golfvöllur Vopnafjarðar er 9 holu völlur innan þéttbýlisins í landi Skála. Þykir völlurinn þrátt fyrir smæð sína einkar áhugaverður við að eiga fyrir golfarann, brautir eru stuttar en mjög krefjandi. Mikil vinna hefur verið lögð í að endurbæta völlinn á síðustu árum og við hann stendur nú glæsilegur golfskáli klúbbsins.